† Благословление от владыкы, покла[няни]е (В прямых скобках восстановлены утраченные и не поддающиеся прочтению места, по аналогии с № 3.) от посадника Михаила, и от тысяцьскаго Кондрата, и от всЪго Новагорода, и от всЪхъ старЪишихъ, и от всЪхъ меньшихъ къ князю Ярославу. На семь, княже, цЪлуи хрьстъ къ всЪму Новугороду, на цЪмь то цЪловали дЪди, и отци, и отець твои Ярославъ. Новъгородъ ти дЪржати въ старинЪ, по пошлинЪ. Что волостии всЪхъ новгородьскыхъ, того ти, княже, не держати своими мужи, нъ дьржати мужи новгородьскыми; а даръ имати тобе от техъ [11] волостии. А бес посадника тобе волостии не раздавати. А кому раздаялъ волости братъ твои Александръ илi Дмитрии съ новгородци, тобе техъ волостии без вины не лишати. А что ти, княже, пошло на Торожку и на ВолоцЪ тивунъ свои дьржати: на своеи чясти дьржати, а новъгородьць на своеи чясти дьржати. А въ Бежицахъ, княже, тобе, ни твоеи княгыни, ни твоимъ бояромъ, ни твоимъ дворяномъ селъ не дьржати, ни купити, ни даромъ приимати, и по всеи волости Новгородьскои. А се, княже, воло[с]ти новгородьскые: Волокъ съ всеми волость[м]и, Тържькъ, БежицЪ, Городьць Палиць, а то есме дали Иванкови, потомъ МелЪчя, Шипино, Егна, Вологда, Заволоцье, ТрЪ, Перемь, Печера, Югра. А в Русу ти, княже, ездити осень, а лЪтЪ не ездити, ездити на Озвадо звЪри гонитъ. А в Ладогу ти, княже, слати осетрьникъ и медовара по грамотЪ отця своего Ярослава. А судъ, княже, отдалъ Дмитрии съ новгородци бежичяномъ и обонижаномъ на 3 лЪта, судье не слати. А из Бежиць, княже, людии не выводити въ свою землю, ни изъ инои волости новгородьскои, ни грамотъ имъ даяти, ни закладниковъ приимати ни княгыни твоеи, ни бояромъ твоимъ, ни дворяномъ твоимъ: ни смерда, ни купцины. А без вины ти мужа волости не лишити. А грамоты ти, княже, не посуживати. А пожне, княже, что пошло тобе и твоимъ мужемъ, то твое. А что былъ отъялъ брать твои Александръ пожне, а то ти, княже, не надобЪ. А что, княже, братъ твои Александръ дЪялъ насилие на НовЪгородЪ, а того ся, княже, отступи. Дворяномъ твоимъ и тивунимъ погонъ имати, како то пошло. А на томъ ти, княже, на всЪмь хрьстъ цЪловати бес перевода, прi нашихъ послЪхъ; а мы ти ся, господине княже, кланяемъ. А что, княже, мыть по твоеи земли, и по [и]нои волости, и по всеи Суждальскои земли, а то, княже, имати по 2 векши от лодье, и от воза, и от лну, и от хмелна короба. А дворяномъ твоимъ по селомъ у купцевъ повозовъ не имати, разве ратнои вести. Тако, княже господине, пошло от дЪдъ и от отець, и от твоихъ и от нашихъ, и от твоего отчя Ярослава.