Подлинник на пергамене; подклеен бумагой. Две печати свинцовые круглые на коричневых шелковых шнурках. 1) Печать посадника; на одной стороне: *** (Юрьева печать Ивановича.); на другой: *** (посадника новгородского.) 2) Печать архиепископа; на одной стороне: *** (Алексей, архиепископ Новгородский); на другой изображение богоматери типа «Знамение» с надписями: *** (матерь божия.). Отверстие в пергамене — след прикрепления третьей печати; по указанию ДрРВ на третьей печати с обеих сторон вырезано: МатвЪя ФалелЪевича тысяцкого новгородского. ЦГАДА, Гос. Древлехр., отд. I, рубр. III, № 15.

Се доконча князь великыи Михаило Олександровичь тфЪрьскыи, приславъ своего посла в Новгородъ Михаила Костянтиновица, съ архиепископомъ новгородьскымъ съ владыкою съ ОлексЪемъ, с посадникомъ съ Юрьемъ, с тысячьскымъ с МатфЪемь, съ всимъ Новымъгородомъ. Что ся учинилось нелюбье князю Михаилу с Новымъ городомъ, и князь Михаило [34] свое бещестье от Новагорода отложилъ, а Новгородъ свое бещестье от князя от Михаила отложилъ. А князю Михаилу свои намЪстникы с Торжьку и со всихъ волостии с новогородьскыхъ свести. А коихъ новгородцовъ или новторжанъ князь Михаило или его боярЪ привелЪ к цЪлованыо, или на поруку по[да]валЪ, или на коихъ грамоты поималъ, с тыхъ князь Михаило цЪлованье снялъ, и поруку свелъ, и грамоты отложилъ. А что пословЪ княжи МихаиловЪ человалЪ крьстъ к Новугороду, с тыхъ Новгородъ челованье снялъ; а что человалЪ новгоро[дь]скыи пословы къ князю к Михаилу, то челованье князь Михаило снялъ. А что полону новторского головъ, головъ новгородьскыхъ и новторскыхъ, въ отцинЪ князя велика[г]о в ТфЪрьскои волости или индЪ гдЪ, тыхъ всихъ князю Михаилу и его боярамъ отпущати безъ окупа, по хрьстному цЪлованию. А что ученился грабежь на ВолзЪ, или индЪ гдЪ, княжимъ лодьямъ Михаиловымъ тфЪрьского, или товаръ поиманъ, или головы побиты от новгородцевъ, то все князь Михаило отложилъ. А что взялъ князь Михаило городъ Торжокъ или волости новъгородьскыи, то все Новгородъ отложилъ от князя от Михаила. А что товаръ поиманъ у новъгородьскыхъ купець и у новторскыхъ из лодЪи рубежомъ до новторского взятья, тотъ товаръ князю Михаилу подавати новгородьскымъ купцамъ и новторскымъ все чисто по челованию; а имъ взяти свои товаръ, человавъ. А будя в миру, князю Михаилу тфЪрьскому не ити ратью на Новгородъ, ни на Новгородьскую волость; ни Новугороду не ити ратью на ТфЪрь, ни на ТфЪрьскую волость на князя Михаила. А гостю гостити съ обЪ половинЪ безъ рубежа. А сии миръ держати безъ льсти и безъ хыт[р]ости. А за холопъ, за робу, за поручникъ, за должникъ, за татя не стояти, съ обЪ половинЪ не стояти. А водЪ, земли межю ТфЪрью и Торжькомъ, Кашиномъ, БЪжицами старыи рубежь правыи, по старымъ грамотамъ. А князь Михаило крьстъ цЪловалъ к Новугороду; а Новгородъ крьстъ цЪловалъ къ князю Михаилу. А кто на се цЪлованье наступить, на того богъ и святая богородица.