Подлинник на пергамене; немного разорван в середине; на обороте крупными буквами: Князя великого Алексанъдра. Печать круглая свинцовая на красном шелковом шнурке; на одной стороне изображение сидящего на престоле Спасителя; на другой изображение св. Александра Солунского с надписью в обратную сторону: *** (Александр.). ЦГАДА, Гос. Древлехр., отд. I, рубр. III, № 13. [27]

† Благословение от владыцЪ МоисЪя, поклонъ от посадника Данила, от тысяцкого Аврама, и от всего Новагорода къ господину великому князю Олександру. На семь, княже, цЪлуи крьстъ къ всему Новугороду, на чемь цЪловалъ дЪдъ твои Ярославъ. Новъгородъ держати ти въ старои пошлинЪ. Что волости новгородьскыхъ, тЪхъ ти волостии, княже, тобЪ своими мужи не держати, дьржати мужи новгородьскыми; а даръ тобЪ, княже, имати от тЪхъ волостии. А бес посадника ти, княже, суда не судити, ни грамотъ давати, ни волостии роздавати. А без вины ти, княже, мужа волости не лишити. А что ти, княже, пошло на Торжьку и на ВолоцЪ: тиунъ свои держати на своеи части, а новгородца на своеи части. А въ БЪжицахъ тобЪ, княже, и твоимъ бояромъ, и твоеи княгыни, и твоимъ слугамъ селъ не держати, ни купити, ни даромъ приимати, и по всеи волости Новгородьскои. А что Олександровыхъ княжихъ селъ купленыхъ или его мужь, а то поидеть къ Олександру князю по исправЪ, по хрьстьному цЪлованью, по заводъ; а ис тыхъ селъ суда имъ не судити, ни дворяномъ Ъздити, ни людии новгородьскыхъ приимати, ни земли. А се, княже, волости новгородьскыи: Волокъ съ всЪми волостьми, Торжекъ, БЪжици, Городець Палець, Мелеча, Шипинъ, Егна, Заволочье, ТрЪ, Пермь, Печера, Югра, Вологда. А кто будеть купилъ села въ всеи волости в Новгородьскои при дЪдЪ моемь ЯрославЪ, и при Васильи, при Дмитрии при АндрЪи, и при отци моемь при МихаилЪ, и при князи при Юрьи, при Дмитрии: кто будеть даромь отъялъ или сильно, а то поидеть бес кунъ к Новугороду; а кто купилъ будеть в Новгородьскои волости, знати имъ своего истьца; или не будеть истьца, како не вЪдаеть истьца своего, цЪловавъ ему крьстъ, куны ему взяти у Новагорода, колько будеть далъ, а земля поидеть к Новугороду; или не окупять, сЪдЪти ему, доколЪ окупять. А нелюбья ти, княже, не держати к Новугороду до посадника, и до тысяцкого, и до всего Новагорода, от мала и до велика, не мьщатися ни судомь, ни чимь же. А што ся дЪяло до твоего княжение и въ твое княженье, того ти не поминати. Што продано княжихъ волостии до Велика дни, а што будеть не продано по ВелицЪ дни, то по цЪлованью повЪдати. А в Русу ти, княже, Ъздити на третьюю зиму, по грамотЪ дЪда своего Ярослава. А лЪтЪ на Озвадъ звЪрии гонитъ. А в Ладогу ти, княже, слати осетрьникъ и медовара по грамотЪ дЪда своего Ярослава. А в Ладогу, княже, Ъздити на третьее лъто. А из БЪжиць ти людии не выводити въ свою волости, ни изы инои волости Новгородьскои, ни грамотъ давати, ни [28] закладниковъ приимати ни твоеи княгыни, ни твоимъ бояромъ, ни твоимъ слугамъ: ни смерда, ни купчины. А без вины ти мужа волости не лишити. А грамотъ ти не посужати. А пожни, княже, что твои и твоихъ мужь, то твое, что пошло. А што будеть дЪдъ твои сильно дЪялъ или иныи князь на НовЪгородЪ, того ти не дЪяти. А рубежь ти, княже, дати правыи, бес перевода, межю отчиною своею и Новгородьскою всею волостью. А новгородьцемъ волости и оброковъ княжихъ не таити. А дворяномъ твоимъ, како пошло: от князя по 5 кунъ погонъ имати, а от тиуна по 2 кунЪ. А что, княже, мыть по Суждальскои земли и въ твоеи волости: от воза имати по двЪ вЪкшЪ, и от лодьи, и от хмельна короба, и от льняна. А дворяномъ твоимъ у купцевъ повоза не имати, развЪ ратнои вЪсти. А свободъ и мытъ на Новгородьскои волости не ставити. Холопъ или роба почнеть вадити на господаря, тому ти вЪры не яти. А на Низу, княже, новгородца не судити, ни дании роздавати. А кто почнеть к тобЪ вадити, тому ти вЪры не я[ти]. А гости гостити по Суждальскои земли новгородьскому бес пакости, без рубежа, по цесаревЪ грамотЪ. А въ Немецкомь дворЪ тобЪ, княже, торговати нашею братьею; а двора ти не затваряти; а приставовъ не приставляти. А села святои Софии исправи святой Софии. А судьи слати на Петровъ день, како пошло. Кто купець, тыи подеть въ сто, а смердъ въ свои погостъ. А ряду вольного не посужати. А самосуда в Новъгородьскои волости не замышляти, по пошлинЪ. А сужьдальскому гости гостити в Новъгородъ без рубежа, бес пакости. А свиньи ти, княже, гонити за шестьдесятъ верстъ около города; а в тои шьстидесятъ новгородьцю гонити, князя докладая князя, (Так в подлиннике.) а дале, куды кому годно. А за Волокъ Ъздити судьи, како пошло по Новгородьскои пошлинЪ. На семь на всемь князь великыи цЪловалъ крьстъ къ всему Новугороду; такоже посадникъ, и тысяцкыи, и весь Новъгородъ цЪловали къ великому князю по любви, въ правду, безъ всякого извЪта.