Се язъ князь великиi Михаiло докончалъ есмь с посадникомь, съ ты[с]яц[ьки]мь, (В скобках стертые буквы.) со всЪмь Новомьгородомь. Рубежь ми дати по старому рубежю. А што селъ покупили моi бояре i слугы в мое княженье, тЪхъ селъ отступился есмь Новугороду бес кунъ: знати ему своего iстьця, у кого купилъ; а што в тЪхъ селЪхъ обилье, а то iмати осподаремъ; а земля Новугороду. А которая села покуплена при князи при ОлександрЪ, при ЯрославЪ, при ВасильЪ, при ДмитриЪ, при АндрЪЪ, на тЪхъ селЪхъ куны iмати у iстьця, а земля к Новугороду; не будеть iстьця, целовати ему, како не вЪдаеть iстьця, i колько будеть далъ на селЪ, куны взяти у Новагорода, а земля к Новугороду. А у кого iмуть окупати село, колко у него будеть селъ, вся iмъ окупати села одинова. А што моi зашелци в Торжьку, а то есмы положили в ысправу. А што грабле[н]о (н вырвано в подлиннике.) у моiхъ людиi, i тому всему судъ. А што поiмани люди моi, пустити вы безъ окупа. А гости нашему ходити без рубежа. Холопы, должники, пору[чни]ки (В скобках стертые буквы.) выдавати по iсправЪ.