† Благословление от владыцЪ, поклонъ от посадника, и от тысячкого, и от всЪхъ старЪишиихъ, и от всЪхъ мЪншиихъ, и от всего Новагорода господину князю великому Михаилу. На семь, господине, Новгородъ всь хрьстъ цЪлуеть. Княжение твое честьно дьржяти по пошлинЪ, безъ обиды; а тобЪ, господине, такоже дьржяти Новъгородъ по пошлинЪ, безъ обиды. Что свободъ Дмитриевыхъ и АндрЪевыхъ, и что сельць тягнуло къ тымъ свободамъ, того всего тобЪ съступитися, то все къ Новугороду бес кунъ. А что, княже, селъ твоихъ, и владычьнихъ, и княгыниныхъ, и бояръ твоихъ, и слугъ твоихъ на Новгородьскои земли: которое село зашло бес кунъ, то бес кунъ поидеть къ Новугороду; а кто купилъ, а тыи знаеть своего истьца или дЪти его; истьца ли не будеть ни дЪтии его, цЪловати ему хрьстъ, како истьча не свЪдаеть, взяти ему куны, колико будеть далъ, по исправЪ, а земля къ Новугороду. А рубежь ти, княже, межю Суждальскою землею и Новгородьскою дати ти старыи, како было при дЪдЪ твоемь и при отци твоемь ЯрославЪ. А что волостьи новгородьскыихъ, тЪхъ волостьи тобъ не дьржяти, княже, (княже написано над строкой.) своими мужи, дьржати мужи новгородьскыми; а даръ тобЪ имати от тЪхъ волостьи. А бес посадника ти, княже, суда не судити, ни волостьи роздавати, ни грамотъ давати. А без вины мужя волости не лишити. А в Русу Ъздити, княже, въ осень, како пошло. А лЪтЪ ездити на Озвадъ звЪрии гонитъ. А за Волокъ ти слати своего мужя изъ Новагорода въ дву носаду, по пошлинЪ; а опять ехати туды же на Новъгородъ, а съ Низу ти не слати; такоже и въ БЪжицЪ. А что пошлинъ князю въ Новгородьскои волости, того вы мене не таити въ всЪхъ волостьхъ. А холопы и поручникы выдавати. А всему тому судъ въ НовЪгородЪ. А что ти, княже, пошло, на Тържьку и на ВолоцЪ: тиунъ свои дьржяти на своеи части, а новгородца на своеи части. А въ БЪжицахъ тобЪ, княже, ни твоеи княгыни, ни твоимъ бояромъ, ни твоимъ слугамъ селъ не дьржати, ни купити, ни даромъ приимати, ни по всей волости Новгородьскои, А се, княже, [22] волости новгородьскыи: Волокъ съ всЪми волостьми, Тържькъ, БЪжицЪ, Палиць Городьць, Мелеча, Шипино, Егна, Заволочие, ТерЪ, Пермь, Печера, Югра, Вологда. А свинии ти бити за 60 вьрстъ от города. А в Ладогу ти, княже, слати осетрьника и медовара по грамогв дЪда твоего Ярослава. А ездити тобЪ, княже, в Ладогу на 3-е лЪто. А из БЪжиць, княже, людьи не выводити въ свою волость, ни зъ иныхъ волостьи новгородьскыихъ, ни грамотъ имъ давати, ни закладневъ приимати ни княгыни твоеи, ни бояромъ твоимъ, ни слугамъ твоимъ: ни смьрда, ни купчины. А грамотъ ти не посужати. А пожнЪ, что твои и твоихъ мужь пошло, то твое и твоихъ мужь; а новгородьское Новугороду. А дворяномъ твоимъ, како пошло, погонъ имати: от князя по 5 кунъ, а от тиуна по двЪ дългЪи. А что, княже, мытъ по Суждальскои земли и въ твоеи волости: от воза имати по двЪ вЪкшЪ, и от лодии, и от хмелна короба, и от лняня. А дворяномъ твоимъ у купьць повозовъ не имати, развЪ ратнои вЪсти. А свободъ ти и мытовъ на Новгородьскои волости не ставити. А холопъ или роба почнеть вадити на господу, тому ти вЪры не яти. А на Низу тобЪ, княже, новгородчя не судити, ни волости роздавати. А кто почнеть [вад]ити (вад и далее ю брат вырваны с клочком пергамена.) к тобЪ, тому ти вЪры не яти. А въ НЪмЪчкомъ дворЪ тобЪ, княже, търговати наше[ю брат](вад и далее ю брат вырваны с клочком пергамена.)иею; а двора не затворяти; а приставовъ не приставливати. А гости нашему гостити межи Суждальскою землею безъ рубежя, по цесаревЪ грамотЪ. А судие слати тобЪ свое на Петровъ день, тако пошло. А вывода ти, княже, межи Суждальскою землею и Новгородьскою не чинити. А что закладниковъ въ Тържьку или индЪ, или за тобою, или за княгынею, или за мужи твоими: кто купьць, поидеть въ свое сто; а смьрдъ поидеть въ свои погостъ; тако пошло въ НовЪтородЪ, отпусти ихъ прочь. А гнЪва ти, княже, до Новагорода не дьржяти ни до одиного человека. А ряду въ Новгородьскои волости тобЪ, княже, и твоимъ судиямъ не посужяти. А самосуда не замышляти. А старостЪ ни холопа ни робы безъ господаря твоимъ судиямъ не судити. А за рубежь из Новгородьскои волости твоимъ дворяномъ суда не водити, ни судити. А свободъ ти и селъ съступитися.